المخدوع الذى لا يعرف الحقيقة

إنهم يتكلمون لغة واحدة , لا تغيير فيها ولا تبديل , كما تقال من أفواه مضلليهم , تقال بالحرف على أفواه تابيعهم وتابعى تابعيهم بدون فكر أو نقاش أو تحاور مع النفس أو محاولة ولو حتى لوجه الله أن يربطوا بين الأحداث والأقوال ومايجرى على أرض الواقع , إنهم وللأسف ليسوا إخوان ولكنهم ناس عاديين ضللهم الإخوان بإسم الدين , ورغم أنهم لم يروا منهم دينا ولا دنيا , إلا أنهم على درب تأييدهم وتصديقهم سائرون حتى لو قالوا لهم أن الشمس أشرقت اليوم من المغرب دلالة على غضب الله من السيسى وأعوانه فسيهتفون مهللين " الله أكبر " .
بعد أن وضع صاحب محل البقالة طلباتى فى كيس وبدأ يحسب إجمالى المطلوب وهو يذكر ثمن كل سلعة أثناء وضعها فى الكيس قلت له تعليقا على زيادة سعر سلعة
- غليتها تانى ؟
- مش أنا والله , هما إللى غلوها .
- التجار دى بتستهبل , مالدنيا إتعدل حالها شوية , فيه إيه ؟
- إتعدل حالها إزاى , دى البلد باظت ياأستاذ
- قصدى إن مفيش شكاوى من بنزين ولا سولار ولا نقل , مش زى الأيام السودة إللى قبل كده
- لسة كل حاجة زى ماهى وإتنيلت أكتر
قلت له وقد بدأ الشك يساورنى أنه منهم , خاصة عندما تابعت منذ شهران أو أكثرحديثا عابرا بينه وبين أحد أصحاب المحلات  المجاورة يجادله فى أحوال البلد وأحسست منه دفاعا عن الإخوان وجاره يعدد له سلبياتهم الواحدة تلو الأخرى وبشكل تهكمى , لم أكن فى مود المجادلة أو الدخول فى حوار أعلم يقينا أنه لن يسفر إلا عن خيبة أمل فى المتلقى , فآثرت الإنصراف مؤجلا المواجهة إلى فرصة أخرى , لم أسعى إليها ولكنها حدثت اليوم , فقلت وأنا أوجه سهم الحوار الذى سيشعل فتيل المواجهة
- ماهو طول ما المتخلفين دول شغالين بهدلة فى شوارع البلد مش حايحصل خير
وكان قولى فعلا هو الفتيل الذى أشعل الموقف
- ماهو من حقهم يعملوا كده
- من حقهم , يولعوا الشوارع والجامعات والبيوت ويخربوها ويقتلوا الناس فى الشوارع , ياراجل دول لسة قاتلين عيل ضغير عنده إتناشر سنة إمبارح
رد ببرود
- ده فين ده ؟
- ولد طالع إمبارح وقت المظاهرة لحقه واحد من المؤمنين بتوعكم ضربه بالخرطوش وقع قتيل فى ساعتها
رد ببرود أكثر وكأنه يؤّمن على موت الصبى كشئ عادى
- طب وإللى ماتوا فى رابعة ؟
فتح فوهة بركان غضبى فصرخت فيه
- مال الولد ومال رابعة , هو إنت لسه مصدق إن رابعة ماتوا فيها آلاف مؤلفة زى ما المتخلفين بتوعكم بيقولوا لكم , إفهم ياعم , السبعات تمانيات إللى بيطلعوا كل يوم يتنططوا فى كل حته مش حايعملوا حاجه ولا حايغيروا حاجة , مرسى خلاص , مش راجع . البلد دلوقتى فيها حكومة ورئيس ...
- السيسى , مش كده ؟
- السيسى مش رئيس , السيسى وزير دفاع
رد بإستنكار
- وهو التانى ده إللى رئيس ؟
- لآ , مرسى إللى كان فلّة وعيشنا عيشة هنية
- بس ماقتلش حد زى السيسى
صرخت فيه
- مرسى ماقتلش , أمال مين إللى قتل ومين إللى بيتحاكم دلوقت ؟ يا عم إبقى إتفرج على قنواتنا وبطل تتفرج على الجزيرة و 25 , أعرف إيه إللى بيجرى بحق
رد بإستنكار وتأفف
- أنا ؟ أنا ؟ , أنا أتفرج على سى بى سى
وبإمتعاض أكبر
- وأشوف لميس الحديدى مرات ....
قاطعته
- بلاش شوف قناة تانية , شوف أون تى فى يمكن ...
وبسرعة قطعت كلامى مستدركا
- لأ لأ بلاش تتفرج على أون تى فى , دى بتاعة ساويسرس الكافر
إبتسامته البلهاء لا تدل إلا على شئ واحد , أننى عبيط ولا أعرف ولا أفهم شئ , هو الوحيد وأمثاله من يفهمون الحقائق الذى زرعها فى أمخاخهم أتباع النبى المزعوم مرسى , قلت له
- إنت مش مسلم ؟
- طبعا
- إنت محتاج حد يعرفك دينك , عندك القرآن وعندك  أحاديث الرسول عليه الصلاة والسلام , إقرأ , ولا مستنى الإخوان ولا غيرهم يعلموك دينك , يا أخى ده الرسول قال لو إلتبس عليك الأمر مابين الحلال والحرام والصح والغلط , إستفتى قلبك , وكل إللى بيجرى قدامك ده وإنت بتستفتى مخابيل مرسى
- أمال عايزنى أستفتى مبارك ورجالته الفلول إللى خاربين البلد
- يانهار مش فايت , مبارك ورجالته , ياراجل إتقى الله , بقى المخربين إللى فى الشوارع دول فلول ؟
- لأ بيخربوا فى مؤسسات البلد
- طيب وبتوع المظاهرات التخريبية كل يوم دول , بتوع حى على الخراب
- دول الشعب المصرى إللى بينزل ضد الإنقلاب
كان هذا كثيرا جدا على الإحتمال
- إللى فى الشارع دول الشعب المصرى ؟
وبحدة مددت يدى
- هات الكيس , إنتم مافيش فايدة من الكلام معاكم , إنتم كلكم شبه بعض , كلامكم كله واحد , طبعة واحدة , السلام عليكم
ناولنى الكيس وهو ينظر لى بإبتسامته المشفقة على حالى , أنا المخدوع الذى لا يعرف الحقيقة .

Posted in: مواقف