هو أنا بس إللى نازل ؟ حدث فى أبو سليمان

فى أول السوق , دكان جزارة بلدى متواضع صاحبه شاب ذو خلق وأدب وحسن تعامل مع الناس , مررت به اليوم وسمعت صوته يتحدث فى إنفعال شديد لبائع السمك جواره وسمعت فى حواره المنفعل كلمة تمرد , قمت بتحيته وأنا أتقدم نحوه فسارع لإستقبالى هاتف كعادته
- ياباشا .
- سامعك بتتكلم عن تمرد .
- من إللى حصل إمبارح فى أبو سليمان .
- عرفت الموضوع , بس إيه إللى حصل ؟
- شباب زى الورد وعيال مؤدبة , صاحب القهوة رحب بيهم وقعد يسمع منهم هو والناس على القهوة والناس إللى إتجمعت عن حركة تمرد وعن إللى ناويين يعملوه , وفجأة جم الناس إللى مايتسموش وهات ياضرب فى الولاد وتكسير للحاجات إللى معاهم وزادت لما ضربوا خرطوش , وواحد فاعد على القهوة جاتله طلقة , ربنا يستر عليه يارب , بطنه إتفتحت وحالت تصعب على الكافر , ساعتها الناس هاجت وإتجمعوا من الشارع ونزلوا من البيوت وهاتك ياضرب فى الكفرة دول , خدوا علقة يستهالوها , ولسة .
- لسة إيه , قصدك يوم 30 ؟
- كله نازل يوم 30 , عارف ياباشا مين إللى نازل , الناس الغلابة إللى زينا , الناس إللى إتمرمطت وماعدتش لاقيه اللقمة من يوم ما ربنا إبتلانا بيهم .
- يعنى نازل يوم 30 ؟
- هو أنا بس , بقولك كل الناس , " يشير بيديه " إللى هنا وإللى هناك , ماحدش راجع بيته إلا لما تزول الغمة دى . ده إحنا بقينا مسخرة مع الراجل ده .
- وكمان بناكل حرام . من قروض الربا إللى بيجيبها .
- ويقولك مسلمين , ده كفاية منظرنا قدام العالم , بقينا فى الأرض وبقينا قلة قيمة , بذمتك دى مصر , كل حاجة باظت فى البلد , ده إحنا مبنقدرش نقضى مصلحة إلا بالفلوس , بقت عينى عينك , ده على أيام إللى فات كان لسة فيه شوية خشا, إنما دلوقت بيمد لك إيده وبقولك هات , ماهما إللى ماسكين كل المصالح . ده والله لو صبرنا عليهم أكتر من كده حايخلصوا علينا واحد واحد .
كان هذا حوارا مع أحد أفراد هذا الشعب الطيب المنكوب بحكم الإخوان وغيره الكثير والكثير والكثير , لقد ذهب الخوف إلى غير رجعة وعندما ينزل الناس يوم 30 يبقى بالبلدى " عداهم العيب " , أعطوه فرصة سنة ودفعوا ثمن هذه الفرصة من حياتهم وقوتهم ومعاناتهم .
نازل يوم 30 ؟

Posted in: أحداث هامة