عالقهوة ( 2 ) دكتور الجواز العرفى وليلة الدخلة

دكتور الحلال : لماذا الزواج بدون ولى حق وحلال 

عامر     : مين الراجل ده ياصابر ؟ وبالراحة علىّ الله يكرمك .

صابر     : الدكتور عبد الرؤوف عون والكتاب المعجزة إللى أصدره إسمه الزواج العرفى حلال حلال حلال .

             وإللى شعلل الموضوع وولعه وولع الناس معاه عمرو أديب فى القاهرة والناس .

عامر     : إنت قلت عنه شيخ , مش كده ؟

صابر     : دكتور وباحث وشيخ ودقنه كده قربت على دقن السلفيين .

عامر     : كمان ! وإزاى يجرؤ على تحريض البنات يعصوا أهاليهم ويروحوا يتجوزوا زى ماهم عايزين .

صابر     : ( ساخرا ) هو للحق قال يابت روحى قولى لأبوكى إنك رايده الشاب ده وعايزه تتجوزيه فإذا

             مارضاش , روحى لجدك لو كان موجود , فلو مفيش فايدة يبقى خلاص روحى إتجوزى إللى إنتى

             عايزاه و ...

عامر     : بس بس , إنت حرقت دمى ياصابر .

صابر     : حرقت دمك إيه بس , أمال لما تسمع الباقى حاتقول إيه ؟

عامر     : ( مناديا ) يابدوى .

صابر     : ( ضاحكا ) إلحقه بالكركديه يابدوى .

عامر     : كمل يامفور دمى . وقول لى إزاى البت تتجوز لوحدها كده من غير ولى .

صابر     : مش تستنى الكركديه الأول . أصل إللى جاى صعب .

عامر     : كمل  ياصابر .

صابر     : إنت حر , قال إن البت إذا ماعرفتش تاخد موافقة من ولى أمرها على الجواز يبقى تتصرف وعداها

             العيب وتروح تتجوز عرفى بدون ولى , عارف ليه تتجوز من غير ولى ؟

عامر     : ليه ؟

صابر     : عشان ولى الأمر مش بيعانى زى البت والشاب مابيعانوا و....

عامر     : إيه ده , والكلام ده كان بيتقال كده عادى .

صابر     : عادى جدا . وإسمع كمان الأدهى من كده . أنه بيهاجم توثيق الزواج ويعتبره بدعة وفساد ولازم

             معالجته لأنها ماكانتش موجودة فى عهد الرسول وصدر الإسلام .

عامر     : ياسلام .

صابر     : وإيه كمان إن التوثيق ده هو إللى كان السبب فى إرتفاع سن الجواز للبت والوله لما وصل لتلاتين

             وأربعين وعشان كده هو بيشجع الشباب على الجواز من غير إذن أهاليهم  

بدوى     : الكركديه ياسى عامر .

عامر     : هات يابدوى ( يشرب نصف الكوب ) كمل ياصابر .

صابر     : تعرف حاطط كمان إيه فى كتابه .

عامر     : حاطط إيه ؟ كيف تضربين أبيك بالشبشب الشرعى ؟

صابر     : ( مقهقها , لو يتمالك نغسه من الضحك ) إلهى يجازيك ياعامر .

عامر     : الله يجازيك إنت ياشيخ , قول لى قال إيه تانى دكتور الحلال ده .

صابر     : أهم حاجة فى الكتاب إنه حاطط فصل عن أفضل طرق المعاشرة الزوجية .

عامر     : الله , ياحلاوه , بيعلمهم بقه بعد مايدخلوا يعملوا إيه .

صابر     : الله ينور عليك , شوف ياسيدى , إزاى تتعامل مع عروستك العرفى الحلال فى ليلة الدخلة , وأيه ,

             بأدق أدق التفاصيل والمسميات وبدون خجل أو خشى .

عامر     : زى الكتب الجنسية إياها دى إللى بتقول كيف تعاشر زوجتك؟

صابر     : ألعن ياعامر , ألعن . دى الكتب دى مؤدبة شويه وواخدة شكل علمى قال يعنى , لكن ده حاطط  فى

             كتابه 8  كتابه طرق فى فن المعاملة الجنسية وبطريقة واضحة وفاضحة جدا من عينة إزاى تقرب

             منها وإزاى تحط إيدك على شعرها وعلى كتقها وعلى ... يا أخى ده عمرو أديب إتكسف يقول يحط

             إيده فين وفين والدكتور قاعد منشكح ولا على باله كأن الناس يتتكلم فى حاجة عادية .

( يتبع )

Posted in: دردشة