عناوين الأخبار

 إليكم عناوين الأخبار فى مصر المحروسة بالتعليق
- عقول غبية وكروت ذكية , قال تلت ترغفة قال  
- الحكومة ورئيسها : أنا وبعدى الطوفان ... الطوفان قرب قوى على فكرة
- مالى وأنا مالى وأنا مالى بالأحزان أنا مالى . لسان حال الإخوان , مؤقتا
- إللى يرضى يتقل مقداره , يستاهل إللى يجرى له
- فى يوم فى شهر فى سبع تشهر , كفاية بقى
- الإنجازات تتحدث عن نفسها , فى بق الإخوان بس
- عندما تسمعهم يقولون " علينا أن " إعرف إن " عليك أنت " مش " عليهم هما "
- في ختام القمة الاقتصادية بالرياض العرب يتفقون علي دعم مصر " وشرائها "
- البورصة تربح 3.8 مليار جنيه , وتخسرهم تانى يوم 
- استقرار الدولار لليوم الثالث , مستقرعلى إرتفاعه
- بدء تطبيق برنامج ترشيد الدعم للبنزين فى أبريل , إبقى قابلنى

Read more »

القرض طلع حلال

مقهى بلدى مزدحم  بالزبائن من مختلف الأعمار والمهن والثقافات , لا أحد يلتفت إلى التليفزيون والكل منهمك فى أحاديث جانبية وسط أنفاس الشيشة البريئة والغير بريئة سواء داخل المقهى أو على الرصيف المحتل ومعه عدة أمتار من تحته وفجاة صاح صاحب المقهى فى فرحة طاغية

صاحب المقهى      : يانور النبى , يا إخواننا , القرض طلع حلال .

زبون                 : بيتقول إيه يامعلم ؟

صاحب المقهى      : بقولك القرض طلع حلال , مفتى الإخوان أعلنها النهاردة .

زبون آخر            : اللهم صل على النبى . حلال بجد .

صاحب المقهى      : والله حلال . حلال .

إنتبه بقية الرواد  إلى الصيحات التى ملأت أرجاء المقهى

واحد                  : صحيح الكلام ده , القرض طلع حلال ؟

إتنين                  : المعلم بيقولك إنه سمع الخير .

تلاته                  : يعنى نطمن كده , الحمد لله .

أربعة                 : أما الناس المغرضين دول ظلمة . ماهو الرئيس قالها إمبارح فى الخطبة .

خمسة                : عايزين يشوهوا الإخوان ويقولوا القرض ربا وحرام .

ستة                   : منهم لله الكفرة . الريس قالها أنا مش ممكن أأكل الشعب من الربا .

سبعة                 : أظن بعد الفتوى دى مفيش كلام تانى .

صاحب المقهى      : كلام إيه , حد يجرؤ يتكلم , ياوله ياحلال , الواحد إتلخبط , ياوله ياهلال .

هلال                  : أوامرك يامعلمى .

صاحب المقهى      : طلبات الزباين إندفعت خلاص , وتنزل حاحة ساقعة على حسابى للكل .

هلال                  : وده ليه يامعلم ؟

صاحب المقهى      : إنت مش معانا ياوله , القرض طلع حلال .

هلال                  : وربنا يامعلمى .

صاحب المقهى      : وربنا طلع حلال . إسمع خليها شربات بدل الحاجة الساقعة . رايح فين ياوله ؟

هلال                  : أبشر الناس يامعلمى .

يخرج إلى رصيف المقهى ويصيح فى الجميع حتى المارة فى الشارع

هلال                  : القرض طلع حلال ياجماعة , القرض طلع حلال .

هاص الشارع وزاط وتوقف الناس للإستفسار والسعادة تملأ وجوههم

زبون                 : إلحق يامعلم , الوله هلال وقف الشارع على رجل .

Read more »

عالقهوة ( 2 ) دكتور الجواز العرفى وليلة الدخلة

دكتور الحلال : لماذا الزواج بدون ولى حق وحلال 

عامر     : مين الراجل ده ياصابر ؟ وبالراحة علىّ الله يكرمك .

صابر     : الدكتور عبد الرؤوف عون والكتاب المعجزة إللى أصدره إسمه الزواج العرفى حلال حلال حلال .

             وإللى شعلل الموضوع وولعه وولع الناس معاه عمرو أديب فى القاهرة والناس .

عامر     : إنت قلت عنه شيخ , مش كده ؟

صابر     : دكتور وباحث وشيخ ودقنه كده قربت على دقن السلفيين .

عامر     : كمان ! وإزاى يجرؤ على تحريض البنات يعصوا أهاليهم ويروحوا يتجوزوا زى ماهم عايزين .

صابر     : ( ساخرا ) هو للحق قال يابت روحى قولى لأبوكى إنك رايده الشاب ده وعايزه تتجوزيه فإذا

             مارضاش , روحى لجدك لو كان موجود , فلو مفيش فايدة يبقى خلاص روحى إتجوزى إللى إنتى

             عايزاه و ...

عامر     : بس بس , إنت حرقت دمى ياصابر .

صابر     : حرقت دمك إيه بس , أمال لما تسمع الباقى حاتقول إيه ؟

عامر     : ( مناديا ) يابدوى .

صابر     : ( ضاحكا ) إلحقه بالكركديه يابدوى .

عامر     : كمل يامفور دمى . وقول لى إزاى البت تتجوز لوحدها كده من غير ولى .

صابر     : مش تستنى الكركديه الأول . أصل إللى جاى صعب .

عامر     : كمل  ياصابر .

صابر     : إنت حر , قال إن البت إذا ماعرفتش تاخد موافقة من ولى أمرها على الجواز يبقى تتصرف وعداها

             العيب وتروح تتجوز عرفى بدون ولى , عارف ليه تتجوز من غير ولى ؟

Read more »

عالقهوة ( 1 ) - دكتور جواز عرفى

شوفى حالك وروحى إتجوزى

( على رصيف مقهى شعبى )

عامر     : السلام عليكم .

صابر     : وعليكم السلام , أخيرا جيت .

عامر     : ( يجلس ) مش بإيدى والله , ( ينادى ) يا بدوى .

بدوى     : أيوه جاى .

عامر     : الشيخ كانت مروقة معاه النهاردة وطول شوية .

صابر     : هى باينها مروقة مع الخلق كلهم .

عامر     : مالك إنت أمال مش مروقة معاك .

صابر     : وإيش عرفك ؟

عامر     : ما هو الجواب باين من عنوانه .

بدوى     : ( يحضر الشيشة ) الشيشة ياباشا .

عامر     : القهوة , القهوة يابدوى الله يكرمك .

بدوى     : دقيقة وحاتكون قدامك . ( ينصرف )

عامر     : ( يأخذ نفسا ) مالك يا سيدنا , فيه جديد ؟

صابر     : ( ينفخ من الضيق ) وهو فيه جديد من باب أصله , كل يوم فيه جديد إن مفيش جديد .

عامر     : فوازير رمضان دى؟

صابر     : لأ وإنت الصادق , فوازير مصر .

عامر     : طب مدام فوازير مصر بقى , سيبنى الأول أشرب القهوة وأعدل مزاجى الأول .

صابر     : إنت يابنى مش عايش فى البلد دى , إيه البرود إللى إنت فيه ده ؟

عامر     : الله يسامحك , مالك , ماتهدى شوية كدة .

صابر     : أهدى إزاى ؟

عامر     : بطل نفخ وإنت تهدى .

صابر     : وهو إللى الواحد شايفه ده يخلى الواحد يهدى .

بدوى     : ( يحضر بالقهوة ) القهوة ياسى عامر .

عامر     : تسلم يابدوى . إيه إللى إنت شايفه النهاردة ومعكر دمك كده ؟

صابر     : النهاردة بس ؟ قول كل يوم .

عامر     : كل يوم , ماتزعلش , بس مش كان أحسن كنت جيت معايا صلاة التراويح .

صابر     : أيوه , عشان تكمل معايا . عشان الشيوخ إللى محتلين الجوامع يكملوا على الشوية إللى فاضلين .

عامر     : لا ده أنت معبى قوى , مالهم الشيوخ كمان ؟

صابر     : إنت مش لسه قايللى إن الشيخ كانت مروقة معاه وطول النهاردة .

عامر     : عادى ياعم , إتعودنا على كده .

صابر     : ماهى دى الخيبة , كل حاجة نسيبها لما نتعود عليها وبعدين نشتكى ونصرخ .

عامر     : يعنى لما الشيخ يطول شوية مافيهاش حاجة .

صابر     : أنا عشان عارفهم وعارف عمايلهم بطلت أصلى التراويح الجامع وباصليها فى البيت قبل ماجى القهوة .

عامر     : تقبل الله , بس الجامع حاجة تانية .

صابر     : الجامع , قصدك الزاوية إللى تحت العمارة إللى إحتلوها شيوخ مانعرفش جم منين .

عامر     : ماهو لو على الجوامع الجوامع , يبقى ماكناش حتلاقى مكان نصلى فيه .

صابر     : والله أنا حاتجنن ياعامر , كل حاجة ماشية بالمقلوب , عشان الناس ضمايرهم نايمه .

عامر     : أنا معاك إن الناس ضمايرهم نايمه , بس برضه فيه شوية لسة ضمايرهم صاحية .

صابر     : زى الدكتور عبد الرؤوف عون .

عامر     : عبد الرؤوف عون ؟ دكتور إيه ده .

صابر     : دكتور جواز عرفى وجواز

Read more »